கமல் சம்பளம் 27 ஆயிரம்... ரஜினிக்கு..? ஜஸ்ட் 3000 (அதிலும் 500 பாக்கி!) - இதெப்டி இருக்கு!!

16 வயதினிலே படத்தில் நடித்ததற்காக கமல் ஹாஸனுக்கு ரூ 27 ஆயிரமும், ரஜினிக்கு ரூ 3000 மட்டுமே சம்பளம் பேசியதாக பாரதிராஜா தெரிவித்தார். 

16 வயதினிலே ட்ரைலர் வெளியீட்டு விழாவில் பாரதிராஜா பேசுகையில், " சூப்பர் ஸ்டார் ரஜினியும் உலகநாயகன் கமலும் இந்த விழாவுக்கு வந்திருப்பது மிகப் பெரிய விஷயம். ஒரு தயாரிப்பாளர் நன்றாக இருக்க வேண்டும் என்ற அவர்களின் மனசுதான் காரணம்.

 எத்தனை ஆண்டுகளானாலும் அன்று நான் பார்த்த அதே ரஜினியையும் கமலையும் இப்போதும் பார்க்கிறேன். இந்த விழாவில் படத்தின் பட்ஜெட் குறித்து பாக்யராஜ் சொன்னார் (ரூ 4.5 லட்சம்). 

உங்களுக்கு தெரியாத ஒரு விஷயம்... இதில் நடித்த கமலுக்கு சம்பளம் எவ்வளவு தெரியுமா... 27 ஆயிரம். இந்தப் படத்தில் பரட்டை பாத்திரத்துக்கு யாரை போடலாம் என யோசித்த போது, 'பாலச்சந்தர் படத்துல ஒருத்தர் நடிச்சிருந்தாரே.. அவர் சரியா இருப்பார்' என்றார்கள். 

அப்போதெல்லாம் ரஜினி ஒரு மோட்டார் பைக்கில்தான் வருவார். வேகமா வந்து தலையை சிலுப்பிக் கொண்டு பரபரவென இருப்பார். அவரைப் பார்த்ததுமே அவர்தான் பரட்டை என முடிவு செய்துவிட்டேன். 

இப்போது அவரிடம் சம்பளம் பேச வேண்டும். சம்பளத்தை முடிந்த வரை குறைவாகப் பேச வேண்டும் என்பதால் நான், 'இது ஒரு ஆர்ட் பிலிம்... உங்க சம்பளம் எவ்ளோ'ன்னு தயக்கத்தோட கேட்டேன். திரும்பவும் இது ஆர்ட் பிலிம் என்று சொன்னேந். அவர் யோசித்தபடி, ஒரு 5000 என்றார். 

நான் 3000 தரேன்னு சொன்னேன். அவர் வேறு ஏதும் பேசவில்லை. உண்மையில் நான் அவருக்கு பேசிய சம்பளத்தில் 500 பாக்கி வைத்துவிட்டேன்," என்றார்.

Read more at: http://tamil.oneindia.in/movies/news/bharathiraja-reveals-kamal-rajini-salary-184747.html